Isa 15 | ZomZIV | STEP | Moab tawh kisai thusuak: Moab a om Ar kisia hi, zan khat thu-in kisusia hi! Moab a om Kir kisia hi, zan khat thu-in kisusia hi!

Isaiah 15

Moab Langah Genkholhna

1 Moab tawh kisai thusuak: ^a

Moab a om Ar kisia hi, ^b
zan khat thu-in kisusia hi!
Moab a om Kir kisia hi, ^c
zan khat thu-in kisusia hi!
2 Biakinnpi ah Dibon paito a,
a munsangte ah a kap dingin kuan to hi;
Moab-te in Nebo le Medeba kah vangvang uh hi.
Lu peuhmah kimet tol a, ^d
khamul peuhmah a kimetmai hi.
3 Lamdungah ippi puan silh uh a;
innkhum tung le tual-awng ah ^e
a vekun khupbawhsa in
kap vangvang uh hi.
4 Heshbon le Elealeh kapkhia a,
Jahaz lamdung tengah amau awging kiza hi.
Tua ahi ciangin Moab galhiam tawite kapkhia uh a,
a lungsi uh hi.
5 Ka lungsimin Moab ka kahkhia hi;
a kidelh khia galtaite Zoar ciang dong,
Eglath Shelishiyah ciangdong a tai uh hi.
Amaute a kah kawmkawmun
Luhith paina lampi dong a paito uh hi;
Horonaim lampi ah
amaute kisiatna tamlawhin a nei uh hi. ^f
6 Nimrim tuite kangcip a, ^g
lopa a keu hi;
anteh sel teng bei a,
lohing khat beek a om kei hi.
7 Tua ciangin amaute in a gawlgawl uh a
hauhnate uh le a kholsate uh Gialhek Lui galah kahpih mang uh hi.
8 Amaute kahkhiatna awging in Moab gamgi dung teng thawn hi;
amau kahkahna in Eglaim dong bana,
amau tamlawhna in Beer Elim dong a ban hi. ^h
9 Dimon ^{▼▼15.9 Masoretic Bupi; Si Tuipi Laizial, Septuagint khutgelh pawlkhat le Vulgate ah Dibon} tuite sisan tawh kidim a,
ahi hangin Dimon ^{▼▼15.9 Masoretic Bupi; Si Tuipi Laizial, Septuagint khutgelh pawlkhat le Vulgate ah Dibon} ah a tamzaw ka tungsaklai ding a -
Moab galtaite tung le a gamua om laite tungah
humpinelkai ka laangsak ding hi. ^k